Umrah ka tarika – Umrah karvani Rit – From Ahmedabad Airport
અહમદાબાદ ગુજરાત થી ઉમરાહ અદા કરવાની રીત ગુજરાતીમાં અહીં આપવામાં આવી છે:
ઉમરાહની શરુઆત:
ઇહરામ ધારણ કરવું:
ઘર થી નીકળવા નાં દિવસે સૌ પેહલા નાપાકી દૂર કરવા માટે ગુસ્લ કરો, ગૈર જરૂરી વાળ સાફ કર લો, નખ કાપી લો. (ગુસ્લ કરવાનું વાજીબ ના હોય તો વઝુ કરશો તો પણ ચાલશે)
પવિત્ર ઇહરામના વસ્ત્રો પહેરો (પુરુષો માટે બે સફેદ ચાદર અને સ્ત્રીઓ માટે યોગ્ય શરીઅત મુજબના વસ્ત્રો). જો તમે અહમદાબાદ શહર થી જ નીકળો છો તો ઇહરામ ઘરે થી પણ પેહરી શકો છો અથવા એરપોર્ટ ઉપર લગેજ ચેક ઇન અને ઇમિગ્રેશન થઇ ગયા પછી પેહલા માળે અથવા ગ્રાઉન્ડ ફ્લોર પર જગ્યા હોય છે ત્યાં પણ પેહરી શકો છો. અહમદાબાદ બહાર થી આવવાના હોય તો એ એરપોર્ટ ઉપર પેહરો. ઇહરામ માટે ૨ રકાત નમાજ અદા કરો.
ફ્લાઈટ નાં સમય થી ૩-૪ કલાક પેહલા એરપોર્ટ ઉપર પોહચી જાવ. છેલ્લી ઘડી એ પોહચવા માં હાજી ને એરપોર્ટ ઉપર હેરાન ગતિ થઈ શકે છે. ઉતાવળ માં જરૂરી કોઈ વસ્તુ ભુલાઈ જાય છે. શહર વાળા ટ્રાફિક પ્રસ્થીતી અને દૂર થી આવતા લોકો એમના પ્રમાણે સમય જોઈ ને આવી જાય.
પાસપોર્ટ, વિઝા, ટિકિટ, મોબાઈલ, રિયાલ, પૈસા, જરૂરી દવા અને હળવો નાસ્તો હેંડ બેગ માં રાખો અને બીજું બધું જરૂરી સામાન મેઈન લગેજ માં લઇ લો.
નિયત કરવી મિકાત (શરૂઆત ની પવિત્ર સ્થાનીય સીમા) પર પહોંચતાં, નિયત કરો:
મિકાત પેહલા નિયત કરવી જરૂરી છે. નિયત કરતા ની સાથે ઈહરામ ની પાબંદી શરુ થઇ જાય છે. નિયત ઘરે થી, એરપોર્ટ પર અથવા ફ્લાઈટ માં બેસી ગયા પછી પણ કરી શકાય છે. ફ્લાઈટ માં મિકાત ની પેહલા એનાઉન્સમેન્ટ કરવાં માં આવે છે પરંતુ ફ્લાઈટ ટેક ઓફ થઈ ગયા પછી તરત કરી લેવી જોઈએ.
ફ્લાઈટ લેન્ડ થઈ ગયા પછી જ્યારે પ્રથમ વખત સર ઝમીન અરબ શરીફ પર પગ મૂકો તો તાજદારે અંબિયા મુહમ્મદૂર રસુલૂલ્લાહ ﷺ પર દરૂદો સલામ પેશ કરો.
જેદ્દાહ એરપોર્ટ ઉપર વાઇફાઇ સુવિધા હોય છે. જે ઇમેઇલ આઇડી દ્વારા સાઇન અપ કરી ને ઈન્ટરનેટ કનેક્ટ કરી શકો છો અને ઘરે મેસેજ પહોચાડી શકો છો. અથવા હોટેલ પર પહોંચી ને પણ કરી શકોછો.
ઇમિગ્રેશન અને ચેક આઉટ થઈ થઈ ગયા પછી બધા એક સાથે રહે અને ગ્રુપ લીડર ને ફોલો કરે. બસ દ્વારા આપણે મક્કા શરીફ પહોંચીશું.
મક્કામાં પ્રવેશ: હરમે મક્કા શરીફ માં દાખલ થઈ ગયા પછી હરમ શરીફ ની પાબંદીઓ લાગુ પડી જાય છે. ૧ નેકી ૧ લાખ નેકી બરાબર થાય છે સાથે ગુનાહ થી પણ બચવું જરૂરી છે. ખાસ કરી ને ફુઝુલ અને અભદ્ર ભાષા બોલવાથી પરહેઝ કરવું જોઇએ અને બીજા ને તકલીફ ના થાય એવી રીતે રહેવું જરૂરી છે. પુરા સફર દરમિયાન સબ્ર અને એકબીજા ની મદદ કરી ને આ સફર ની રૂહાનીયત મેળવી શકાય છે.
મક્કામાં હોટેલ ચેક ઇન થશે. બધાને પોત પોતાના રૂમ મળી જાય અને ફ્રેશ થઈ ગયા પછી રિસેપ્શન પર એક સાથે ભેગા થઈ ને ઉમરાહ કરવા માટે મસ્જીદે હરામ માં જઈશું.
મસ્જિદુલ હરામમાં પ્રવેશ:
મક્કામાં પ્રવેશીને મસ્જિદુલ હરામ તરફ જાઓ. મસ્જિદ માં દાખલ થવા ની દુઆ પઢવી. લબ્બૈક કસરત થી પઢવાનું ચાલુ રાખવું. કાબા તરફ પહેલી નજર પડે ત્યારે દુઆ કરો. તમારી દરેક દુઆ માં ગાઝા ના મઝલૂમ મુસ્લિમો ને ખાસ યાદ રાખજો.
તવાફ (કાબાના ચક્કર):
કાબાની આજુબાજુ 7 ચક્કર કરો. હજરે અસ્વદ (કાબાના કાળા પથ્થર) પાસેથી તવાફ શરૂ કરો અને સમાપ્ત કરો.
ઇહરામ ની હાલત માં કાબા શરીફ ને અથવા સંગે અસ્વદ ને સ્પર્શ કરવા નું ટાળો કારણકે એમાં ખુશ્બૂ લગાવેલી હોય છે.
દરેક ચક્કરમાં તલબીયાહ અને અલગ-અલગ દુઆઓ કરો.
શરૂઆત નાં ૩ ચક્કર માં મર્દ હઝરત રમલ કરે જો શક્ય હોય તો. ભીડ હોવાને કારણે ના કરી શકે તો કોઈ વાંધો નહિ.
ગ્રુપ લીડર ને ફોલો કરો. ગ્રુપ માં થી કોઈ માણસ ભીડ ના કારણે છૂટા થઈ જાય તો પણ ગભરાવાની જરૂર નથી. ઉમરાહ મુકમ્મલ કરી ને ડાયરેક્ટ હોટેલ પણ આવી શકે છે અથવા કોઈ એક મુકામ ઉપર મળી શકે છે.
ગ્રુપ માં બધાં એક સાથે તવાફ કરવું લગભગ મુશ્કેલ હોય છે. તવાફ દરમિયાન બધા છૂટા પડી જ જાય છે. એટલે પોતપોતાની ફેમિલી સાથે એક બીજા ને પકડી ને સાથે રહેવું. ખાસ કરીને બચ્ચાઓનું ધ્યાન રાખવું પડશે.
તવાફ મુકમ્મલ થઈ ગયા પછી ૨ રકાત નમાઝ પઢે. ખૂબ દુઆઓ કરે. બને તો મકામે ઇબ્રાહિમ ની સીધ માં આસપાસ જ્યાં જગ્યા મળે ત્યાં નમાઝ અદા કરે. ઝમઝમ ના કૂલર દરેક જગ્યા એ ઉપલબ્ધ હોય છે. ખૂબ સૈરાબ થઈ ને ઝમઝમ પીવાનું. અને યાદ રહે પુરા સફર દરમિયાન બને ત્યાં સુધી ઝમઝમ નું પાણી જ પીવાનું રાખવાનું.
સફા અને મરવા વચ્ચે સઈ:
સફા પર ચડીને કાબા તરફ મોં કરો અને દુઆ કરો. સફા અને મરવા વચ્ચે 7 વાર આવવા-જવાના ફેરા કરો. શરૂઆત સફાથી થાય છે અને સાતમી મરવા પર સમાપ્ત થાય છે. દરમિયાન માં લીલા રંગની લાઇટ આવે ત્યાં મર્દ હઝરત ઝડપથી દોડીને પસાર થાય. સઈ દરમિયાન તમે દુઆ, તસ્બીહ, દરૂદ કંઈપણ કરી શકો છો.
આખીરી અરકાન:
હલક (મુંડન) અથવા તકસીર (વાળ કાપવું):
પુરુષો માટે સંપૂર્ણ મુંડન અફઝલ છે અથવા વાળ પણ કાપી શકાય છે. મરવા ની પાસે અથવા ક્લૉક ટાવર માં હજામ ની દુકાનો હોય છે.
સ્ત્રીઓ માટે વાળનો થોડો ભાગ કાપવો (અંદાજે એક ઇંચ). વાળ કાપવા માટે પોતાની હેંડ બેગ માં નાની કેંચી સાથે રાખવી.
હલક અથવા વાળ કાપ્યા પછી તમારું ઉંમરાહ મુકમ્મલ થાય છે. ઇહરામ ની પાબંદીઓ સમાપ્ત થઈ.
વધું માં વધું નેકીઓ હાંસિલ કરો:
નમાજ અને દુઆમાં અલ્લાહથી માફી માંગો અને પોતાની ખાસ જાયઝ મકસદ માટે દુઆ કરવી. ઉમરાહ દરમિયાન તલબીયાહને વારંવાર પઢતા રહેવું. ગુનાહો થી મગફીરત માટે ખૂબ અસ્તગફાર અને તૌબા કરવી. કસરત થી દરૂદ શરીફ અને કુરાન શરીફ ની તિલાવત કરવી. શકય હોય એટલા વધુ નફલી તવાફ કરવા અને રોઝો રાખવું. દરોઝ ઓછામાં ઓછી ૧ રીયાલ સદકો આપવું. લોકો ને ધક્કામુક્કી અને ઈજા પહોંચાડવાથી બચવું. કબૂતર બિલાડી ને ઈજા આપવી નહીં. ખાવાનું વેડફવું નહીં. ગમે ત્યાં કચરો કે ગંદકી કરવી નહીં. આ રસુલૂલ્લાહ ﷺ ની જન્મ ભૂમિ છે. અદબો અહતરામ સાથે રહેવું જોઈએ.
